پان و پان تورکیسم!
پان یونان دیلینده چوخلوق(همه) و یانچی( طرفدار) آنلاملاریندا ایشله نیر؛ آما سییاست دونیاسیندا آیری بیر آنلامی وار.
سییاستده «پان» یانی حددیندن آرتیق طرفدارلیق ائله مک؛ و بئله آچیقلانیر:
ایر بیر اؤلکه ده نئچه میللت و قوم یاشایا، و سیاسی ، اقتیصادی، فرهنگی، نیظامی گوج اونلارین بیرینین الینده اولا، و اونلار او بیریسی میللت و قووملاری اؤز حاقلاریندان محروم ائده لر؛ بئله بیر میللت و قوما پان لقبی وئریلر.
ایندی سیز باخین گؤرون ایراندا سیاسی گوج هانسی میللتین الینده دیر؟ و هانسی میللتلر اونلارین الی ایله لاپ او بیرینجی حاقلارینداندا محرومدورلار؟ هانسی میللت اؤز آنا دیلیندن محرومدور؟ هانسی میللت اؤز یوردوندان- یوواسیندا کؤچورولور؟ هانسی میللتین داغلارینین، داشلارینین، شهرلرینین، کندلرینین آدی تحریف اولور؟ بللی دیر کی بونلارین بیری آذربایجان تورکلریدیر.
آذربایجان تورکلرینین الینده هانسی سییاسی گوج وار کی او بیریسی میللتلری تاپداسینلار ، تحقیر ائتسینلر؟ بو ایندی کی وضعیتله اولابیلر؟
بیز بو سؤزلردن بیر سونوج آلا بیله ریک، و اودا بو کی ایراندا یالنیز و یالنیز بیر پان اولا بیلر، و اودا پان فارسیسم دیر. چونکو ایندی کی دؤورده سییاسی گوج تکجه اونلارین الینده دیر!
تورکلر و آیری میللتلر اوچون پان لقبی وئرمک یانلیش و ساختا بیر سؤزدور، بونا گؤره کی اونلارین الینده هئچ سییاسی بیر گوج یوخدور!
آما نه اوچون بو یانلیش و ساختا سؤز بیر مارک کیمی بویون بو میللتین کوره یینه یاپیشیر؟
بودا چوخ آیدین بیر مسئله دیر! بیر میللتین قانون چرچیوه سینده اولان ایستکلرین آخساتماق اوچون گره ک اونا اویدورما بیر ایدولوژی تعریف اولونسون! بو اویدورما ایدولوژی بیزه بوندان عیبارت اولور کی گلیرلر ، پان تورکیسم کلمه سین بیلمه یه- بیلمه یه یا بیله- بیله! اورتایا آتیرلار؛ و سونرا دئییرلر کی پان تورکیسم یانی: آیریلیق ایسته ین، دینی و مذهبی ایسته مه ین،... و بئله لیکله آنا دیلین سئونده اولور پان تورکیسم! وطنین و توپراغین سئونده!
بیلمه لی ییک کی ایران اؤلکه سینین آنا یاساسیندا ، رسمی اورگانلاریندا و یا سازمانلاریندا پان تورکیسم نه تعریف اولوب، و نه اونون چون بیر جورم یازیلیب! آما تاسفلر اولسون کی، بیز ایللر بویو دو ، گؤروروک کی بو کلمه چوخلارینین الینده بیر چوماق کیمی ایشله ییر! بو یانلیش کلمه بیر چوخ رسمی آداملارین و قزئتلرین طرفیندن هئی-هئی دیله گتیریلیرو چوخ آداملار پان تورکیسم لییه موتتهم اولوب، و اؤز حاقلاریندان کسیلی قالیرلار!
بونودا دئمه لی یم کی تورک میللتینین دوشمانی، فارس میللتی دئییل! بلکه بیر پارا شئونیزم لردیر کی چالیشیرلار بئله بیر اویدورما ایدولوژی ایله، بیر میللتین بوتون ماددی و معنوی وارلیغین الیندن آلسینلار!
قوجا قارتال- رضا دهقان(چنگی)
يازين نفسيله يارپاق- يارپاق، بوداق- بوداق پؤهره له نن آغاجلار هردن تورپاغين درين قاتلاريندا قالان و اؤز ايشيني گؤرن كؤكلريني يادا سالماديغي كيمي؛ خالق دا شاخه- شاخه مين ايللردن او اوزونه اوزانان و اؤز بوگونكو بويوندان يوز دفعه لر بؤيوك اولان كؤكلريني اونودور. گله جك بوتون بؤيوكلويو و گؤزله نيزلنيلمزلييي ايله گئچميشين سارسيلماز اوزلو اوزه رينده دايانير.گله جك گئچميشين شاگيردي دير، ومعلليميني نه قدر ياخشي دويسا او قدر گوجلودور.نه قدر جان آتسادا، گئچميش آدلي كؤكوندن قوپا بيلمز و بوتون يئني چالارلاري، بوي لارينا باخماياراق او زامان- زامان اؤز گئچميشيني تيكرار ائدير. بونا گؤره ده ايلكينلييه گئدن يول، اصلينده ، گله جه يه گئدن يولا ايشيق وئرير.