سن جور آداملار!
بعضی بین المللی! کنگره لرین قورولماسی موناسیبتینه
سن جور آداملار!
خان ایدی؛اونا، ائله بیزیم قونشو کتده خان دئیردیلر،
ایشی داوار، اینک، آت... اوغورلاماق ایدی،
بیر گون بو دؤور - برده بیر شئی تاپیلمیر؛
ممدآلی یا دئییر کی، سحر حاضیرلانارسان،
آراز قیراغیندا ائلاتلارین یانینا گئده جه ییک،
سحر، خان بیرده ممدآلی یولا دوشورلر.
اورادک بیر- ایکی دست گؤزل پالتار، بیر آت،
بیرده ائششک تاپیرلار، او زامان یئتیشرلر کی
شام واختییدی، بیرده کی اؤزلرین ائله بزه ییرلر،
همیشه کی کیمی بیری خانا، بیرده نؤکره بنزه ییر،
سوراقلاشاندان سونرا بیرینین ائوینده قوناق اولورلار،
یئییب، ایچندن سونرا آلیش - وئریشه باشلاییرلار.
یئتمیش بئش دنه داوار سئچیب، ائنله ییرلر؛
بونودا دئییم؛ خان یئییب ، ایچنده؛ ممدآلی، الی
سینه ده اونا قوللوق ائله ییردی، قاباق- قاباق
گلیب، دالی- دالی گئدیردی! خان امر بویوراندا
دووروب، تئز الین گؤزونه قویوب، بیر آندا او ایشی
گؤروردو. ائله داوار سئچنده ده، خان امر ائله دی:
ممدآلی داوارلارا رنگ ووراندان سونرا، پوللاری
خورجوندان گؤتوروب، ائوه گتیر، آغانین بورجون وئرک.
نه پول! خورجوندا ایکی آرپا چؤره ییندن ساوایی
بیر شئی یوخودو! ممدآلی الی سینه ده ایچه ری گیریب،
یاواشجا خانین قولاغینا دئدی: ائله بیل خانیم پوللاری
خورجونا قویماییب! خان چوخ ناراحات حالتده ممدآلی نین
پئیسرینه بیر شاپالاق اَندیریب، دئدی: هئچ زادا
یارامامیسیز! ایندی بس نئیله یک؟ ائلات سوروشدو!
نه اولوب؟ خان ماجرانی ائلاتا آچدی. سونرا عوذور
ایسته ییب، دئدی: گئدیب پوللاری گتیرسینلر، سونرا
داوارلاری آپاراق! ائلات دئدی: اوندا گرک منیم
نعشیمدن گئچه سیز! منه ایراد دیر! داوارلاری
آپارین، گلن هفته ممدآلی گتیرر. خیلاصه آخیردا
راضیلاشدیلار!
شامی یئییب، گئجه نی ده اورادا یاتیب، سحر تئزدن
یئمیش بئش داواری سوروب، کنده گتیردیلر،
اوتوز اوچو قونشو کتده قومارا گئتدی!
ایکیسی ممدآلی یا، اوتوز بئشی خانین عاییله سینه یئتیشدی!
بو سؤزون اوستوندن بیر اوچ- دؤرد آی گئچمیشدی!
ائلات کتده خان ایله، ممدآلی آختاریردی!
بیر کوللوک خانایا یئتیشیب، گؤردو؛ ممدآلی اورادا
تومانین چیخاردیب، بیتلرین آریتلاییر، ائلات
سوروشدو: خان هاردا؟ ممدآلی خانین ائوین
گؤرستدی؛ ائلات باخیب گؤردو، نه خان!
ائو - ائشیک بیر خارابالیق دییرمانا بنزه ییر!
ائلات بیر بامباچا اؤز باشینا، بیرینده ممدآلینین
باشینا(کی شالواری الینده اورادا دورموشدو)
چالیب؛ اؤز ائلات دانیشیغی ایله دئدی:
آی ممدآلی! سنین او خانین قاباغیندا اییلیب،
دوزلمه لرین؛ او قاباق- قاباق گئدیب،
دالی - دالی گلمه لرین منی آلداتدی؛
او یئتمیش بئش داواری وئردیم گئتدی!!
سنی اؤله سن! سن جور آداملار، آدامی
چاشدیریردا!!
گرگرلی آراز- رضا دهقان(چنگی)
يازين نفسيله يارپاق- يارپاق، بوداق- بوداق پؤهره له نن آغاجلار هردن تورپاغين درين قاتلاريندا قالان و اؤز ايشيني گؤرن كؤكلريني يادا سالماديغي كيمي؛ خالق دا شاخه- شاخه مين ايللردن او اوزونه اوزانان و اؤز بوگونكو بويوندان يوز دفعه لر بؤيوك اولان كؤكلريني اونودور. گله جك بوتون بؤيوكلويو و گؤزله نيزلنيلمزلييي ايله گئچميشين سارسيلماز اوزلو اوزه رينده دايانير.گله جك گئچميشين شاگيردي دير، ومعلليميني نه قدر ياخشي دويسا او قدر گوجلودور.نه قدر جان آتسادا، گئچميش آدلي كؤكوندن قوپا بيلمز و بوتون يئني چالارلاري، بوي لارينا باخماياراق او زامان- زامان اؤز گئچميشيني تيكرار ائدير. بونا گؤره ده ايلكينلييه گئدن يول، اصلينده ، گله جه يه گئدن يولا ايشيق وئرير.