شاعیرلر
ملك الشعرالر:
بو شاعيرلر رديف و قافيه اؤلوسودورلر! بونلار شعير يازاندا، اوول باش بير ياخشي رديف تاپيرلار، سونرا ايسته ديكلري قافيه لري بير- بير دوزوب؛ اوندان سونرا بوش يئرلري دولدورماغا باشلاييرلار! هردن گؤرورسن بير كلمه اؤز يئرينده يئكه خيردا گلير! اوندا اونو بير آيري كلمه ايله دَييشيرلر! آيري كلمه تاپا بيلمه ينده، ائله همان كلمه نين باش- قولاغين بير آز يونتالاييب، زوراكي كلمه لرين آراسينا يئرلشديريرلر! شعير قوتاراندان سونرادا اونون اوستونه بير سوواقدان- زاتدان چكيب و آلچاق- اوجاسين ايتريرلر! بو سيرا شاعيرلرين شعرينه ايراد چيخارتماق اولماز! آداما يامان- يوووز دئيرلر!
اؤرنك:
«شمعين آخان ياشين گئجه پروانه دن سوروش
پروانه نين طوافيني بيگانه دن سوروش
ائولر ييخان گؤزون اوخ آتان كيپريگين سؤزون
بيگانه بيلمه سين هله ويرانه دن سوروش
-----------------------------------
--------------------ديوانه دن سوروش
-----------------------------------
--------------------افسانه دن سوروش»
و الي آخر «نصير جيناس»
سرحدلري سينديران شاعيرلر(پست مدرن):
بو سيرا شاعيرلر دئييرلر كي بيزيم ادبياتيميز و شعيريميز دونيا ادبياتيندان چوخ دالي قاليب! اونا گؤره ده بونلار آيري اؤلكه لرين شاعيرلرين اؤزلرينه اولگو گؤتوروب و هئي- هئي اونلاري يانسيلاييرلار! وهردن ده بير اونلارين شعيرلرين بيزيم ديله كؤچوروب، و اؤز آدلارينا اوخويورلار! كيم نه بيلير؟ بو شاعيرلرين چوخو باش توكلرين اوزاديب و چنه اوجو ساققال ساخلاييرلار. كيلاسيك شعيردن و موسيقي دن زهله لري گئدير!
اؤرنك:
يوخو!
من!
اينتيحار سسي!
يوخودان آييلديم!
آجليق!
دوروب، يخچالين قاپيسين آچديم؛
40 درجه سويوق!
تويوق ديشلرين آغارديردي!
هئي!
من،
يخچال،
تويوق. «گؤزو توخ»
جشنواره شاعيرلري:
بو سيرا شاعيرلر فقط گؤزده- قولاقداديرلار كي بير شهرين ايرشاد ايداره سينين يا آيري بير اورگانلارين طرفيندن شعير جشنواره سي قويولسون، هر نه قونودا دا اولور، اولسون، بونلارا فرق ائله مز! چونكو بو شاعيرلرين آماجي فقط يازيب، اؤزلرين گؤزه سوخوب و بير نئچه تومن پول آلماقدير! ايندي نه فرق ائله يه جك؛ جشنواره، قولام عابباسين دوغوم گونونه حصر اولسون، يا فيضضه نين اؤلوم گونونه! بونلار تويدا اويناييرلار! ياسدا آغلاييرلار!
اؤرنك1:
سن جنگ ده بير شيرِ ژيان سان قولام عابباس
دوشمن گؤزونه تير و كمان سان قولام عابباس
... «اوستاد رضازاده مرندي»
اؤرنك2:
قولام عابباس، مردي از آن دور دستها!
دو گاو دارد و يك خر،
بسيار با غيرت! «مرضيه»
هر نه گلدي شاعيرلري:
بو سيرا شاعيرلر چاليشيرلار كي بوتون قونولاردا شعير يازسينلار! كيلاسيك، ياريم كيلاسيك، مودئرن، پوست مودئرن، آغ، قارا...ايسته ييرلر بوتون مجليسلرده اؤزلرينه يئر آچسينلار!
اؤرنك1(سفيد):
هوپ توتوپ شهر!
كوچه لرده سولك ايتلر زيبيل قابلاري اوسته بوغوشورلار!
بيز قورخودان ائشييه چيخا بيلميريك!
سحره چوخ قالمير! « قورخماز آسلان»
اؤرنك2(اؤيكو):
خياوانلارين آسفالتين ماشينلار قوپارتديقجا،
شهردار قير وئريردي!!
«ائوسيز قنبر»
اؤرنك3(كلاسيك):
پرسيدم از حسن كه چرا در صفي، بگفت!
چشم حسود كور، به ما مرغ ميدهند!
«بازار اوغلو»
كند شاعيرلري:
ايندي هئچ اولماسا هر كتده بير شعير يازان تاپيلير! بو شاعير قارداشلار و باجيلاريميزين هاميسيدا اوولده اؤز كندلري اوچون بير شعير يازيرلار! و او شعيرده اؤزكتدلرينين ساري ياغين، بالين، پئنديرين، قايماغين، ارييين، آلچاسين، بادامين.... بوللو تعريف ائديب، هر يئرده بو شعيرلرين اوخويورلار!
اؤرنك اوچون:
«مارازا» نين گؤزل اريك باغلاري
قارپيزي، قوووني، خييار تاغلاري
قويونلارينين قاراسي، آغلاري
باخ نه قشه هدير بيزيم كنديميز!
«ولي قوتاز»
ايندي سيز مارازا كلمه سين گؤتوروب، اونون يئرينه آيري بير كند آدي قويساز، يئنه آيري بير شعير دوزه لر، آيري بير شاعيرين آدينا!
بونودا دئييم كي كند شاعيرلري بتر «قره باغ شيكسته سي» اوخويارلار.
راديو- تئليوزيا شاعيرلري:
بو سيرا شاعيرلرين چوخو دؤولت ايشلرينده ديرلر، و اونلارا اعتيماد چوخدور! گؤرورسن بيردن راديو طرفيندن زنگ وورولدو كي، جناب شاعير! فيلان قونودا بير شعير ياز؛ ساباح آخشاملار برنامه سينده اوخوياجاقسان. اودا فوري يازير!
اؤرنك:
«آدام دوشور يئنه ده مين خياله آخشاملار
آتا، قه شوو چكيلير، بيزه ماله آخشاملار
اوشاق گلير هوسه اوجالاندا راديو سسي
سالير جماعتي بير اعتداله آخشاملار.»
«تبريزلي جفي»
دربار شاعيرلري:
بو سيرا شاعيرلر ايندي كي زاماندا تاپيلماز! چونكو ايندي نه دربار وار، نه ده شاه. اونلارين نسلي دئمك اولار كي آرادان گئديب. دربار شاعيرلرينين چؤره يي بالدا اولاردي، اونلارين باشينا قضا- قدر گله بيلمزدي! هردن بير شاهي تعريفله ييب، و سيله- ميله ده آلارديلار! كيتابلاري سانسورسوز چاپ اولاردي؛ اوزلري نوراني، و بارماقلاريندا بير يا ايكي قاشلي اوزوك اولاردي، قديم اونلارا ميرزا دا دئيرديلر.
اؤرنك(مظفرالدين شاه مجليسيندن):
«اي جهان اهلي بيلين قبله عالم دير بو
ريخنه دوشمز ديبينه، داش كيمي مؤحكم دير بو
گتيرين جام شرابي، بو باهار ايامي
نه قدر ايچسه داغيلماز، بئله كي جم دير بو»
«ميرزا تقي خان قزويني»
قوجا قارتال
رضا دهقان(چنگی)
يازين نفسيله يارپاق- يارپاق، بوداق- بوداق پؤهره له نن آغاجلار هردن تورپاغين درين قاتلاريندا قالان و اؤز ايشيني گؤرن كؤكلريني يادا سالماديغي كيمي؛ خالق دا شاخه- شاخه مين ايللردن او اوزونه اوزانان و اؤز بوگونكو بويوندان يوز دفعه لر بؤيوك اولان كؤكلريني اونودور. گله جك بوتون بؤيوكلويو و گؤزله نيزلنيلمزلييي ايله گئچميشين سارسيلماز اوزلو اوزه رينده دايانير.گله جك گئچميشين شاگيردي دير، ومعلليميني نه قدر ياخشي دويسا او قدر گوجلودور.نه قدر جان آتسادا، گئچميش آدلي كؤكوندن قوپا بيلمز و بوتون يئني چالارلاري، بوي لارينا باخماياراق او زامان- زامان اؤز گئچميشيني تيكرار ائدير. بونا گؤره ده ايلكينلييه گئدن يول، اصلينده ، گله جه يه گئدن يولا ايشيق وئرير.