دمير قاپي، ميسي رهده
دمير قاپي، ميسي رهده
بير گون دوستوم ايسكندر ايله قه فه خانادا اوتورموشدوق، هر اوجاقدان بير كؤز، هر دره دن بير سؤز تاپيرديق؛ بيردن- بيره ايسكندر دئدي: بابا بيلميرسن كي! تئهراندان منه بير حياط قاپي سي گله جك، قاپي، نه قاپي! 75 ميليون تومن قيمتي دير. من هله بير سؤز دئمه ميشدن، يئريندن بير ده به شيب، اؤزون يوخاري چكيب دئدي: بلي! سن بيزي خيردا آدام حئسابلاما! ايسكندردي ها!
سؤزون دوزو قالميشديم! نه قاپينين 75 ميليون اولدوغونا اينانا بيليرديم! چونكو 75 ميليون بير دست دام- داش پولو اولور؛ نه ده ايسكندرين سؤزونون يالان اولدوغون دئيه بيليرديم! آخي اودا يالان دانيشان آدام دئييلدير! آزي آيريسينادا يالان دانيشسايدي، منه كي داخي يالان دئمزدير.
سوروشدوم: بو قاپي نئجه قاپيدير كي، 75 ميليون اونون قيمتي دير؟ نه ساياق دوزه لينيب؟ ماتريالي نه دن دير؟.... دئدي: گله جك، گؤره جكسن. دئديم هاچان گله جك؟ دئدي: ايندي هله اوستالار اونون اوستونده ايشله ييرلر! بابا خيردا بير ايش دئييل كي! ائله ناخيشلاري اولاجاق كي هئچ كيم گؤرمه ييب، گؤرسه لر، دئيه جكلر بو ناخيشدان ياخيشيسي اولا بيلمز! بيرده بو قاپيدان اوغرو گيره بيلمز! چوخ دوز قاپيدير! بو شهرده تك اولاجاقدا! ايكي آي چكرگلينجه! گله جك گؤره جك سن! البتته گؤرمه سينينده خرجي وار ها! ائله موفته دئييل كي!
داها بير سؤز دئيه بيلمزديم. او گون واخت بيتدي. سونرالار ايسكندر مني گؤردوكجه، او قاپيدان بير سؤز سالماميش اولموردو؛ هئي ايسته ييردي اونو بوللوجا تعريفله سين!
بونودا دئييم كي، ايسكندر گيل ايله بيزيم، نئچه ايل بوندان قاباق گئت- گليميز وار، اونلارين حياط قاپيسي كؤهنه جويز آغاجينداندير، تك بير دؤيمه جه سي وار! ياني كيشي ده، قاديندا، يئكه ده، اوشاقدا، ايسكندر گيله گلنده ائله او دؤيمه جه دن يارارلانا بيلر.
ايكي آي سونرا ايسكندره زنگ ووردوم كي، گئدك قه فه خانييا. سئوينه- سئوينه دئدي: بابا هله گلين تزه قاپيني گؤرون! سونرا گئدريك. پيمان ايله من ايكيميز بير ته هر اونو راضي سالديق كي اوول گئدك قهوه خانييا، قاييداندا قاپييادا باخاريق. قه فه ده، ايسكندر قاپيدان دئييردي، بيزده بلي لرين يئتيريرديك، نئيله يه يديك! نه قاپيني گؤرموشدوك! نه ده قاپيدان باشيميز چيخيردي! دوزو، بير آزدا ايسكندردن قورخوردوق! اونا گؤره فقط اونو تعريفله ديك! بودا ايسكندرين خوشونا گلدي و چاي- قليان پولوموزودا حئسابلادي!
هاوا قارانليقلاميشدي! بيزي تله سديره- تله سديره ائولرينه گتيردي، تئهراندان گه لن دمير قاپيني، حياطينين يانيندا كي توكانا قويموشدو. توكانين قاپيسين آچيب، اؤزو ايچه ري گيريب، چيراغي يانديردي! بيزده اونون آرخاسيجا گئچديك ايچه ري. ايندي بيز قاپييا باخيريق، ايسكندرده بير قاپييا بيرده بيزيم نئجه داورانماميزا باخير!
آخير سؤزه گلدي: بو قاپي كي گؤرورسوز، ايكي تايي وار، بيري يئكه، بيري خيردا. يئكه تايين اوستونده كي دؤيمه جه كيشيلر اوچوندور! خيردا تايين اوستونده كي دؤيمه جه ده قادينلار اوچون! سونرا اوز توتوب منه دئدي: چنگي! سن بير خيردا تايين اوستونده كي دؤيمه جه ني دؤي گؤروم! من ها چابالاديم اونون دؤيمه سيني باجارماديم! منه برك گولوب، دئدي: اَه، سن لاپ ناشييميشسان! اوز توتوب پيمانا دئدي: بو باجارمادي، اؤزون گئچ، پيمان الين آتيب، تئزجه دؤيمه جه ني توتدو؛ اونو بير تيكقيللداتدي؛ ايسكندر اؤزوده او بيريسين تيكقيللداتدي! گؤردوم كي هه، بونلارين هره سينين بير جوره سسي وار! بيري اينجه دير و قادينلار اوچوندور؛ او بيريسي قاليندير و كيشي لر اوچون.
سونرا ايسكندر دئدي: بو قاپينين رنگي اوول بئله دئييلدير! اونو اوستا باشقا جوره بوياميشدي. او رنگ بير آز آچيق رنگيدي! او رنگدن قاباقجا چوخ يئرده گؤرموشدوم؛ و بيليرديم كي جماعاتا تزه لييي يوخ! اونا گؤره اوستايا تاپشيرديم كي اونون اوستونه بير توخ رنگ وورسون! ايندي بو رنگين هله اوولي دير، هامي اونو سئوه جك! نئجه كي سيز به ينديز!
دئديم ايسكندر! بو قاپيني هاچان قوراجاقسان؟
دئدي: بو قاپي بوراجان چوخ خرج گؤتوروب! بير آي گره ك اونون يئرين هامارلاياق، بير آيدا چكر اونو اؤز يئرينده اوتورداق! اونودا گرك چوخ احتياطلا قاباغا گئدك! بنناسي دا گرك چوخ اوستا بننا اولسون و بيزيمده اونا اعتماديميز اولسون؛ آللاه ائله مه ميشدن قاپيني قوراندا سينديرسا، هم خرجيميز باتار، هم ائلين يانيندا آبريميز گئدر! بيرده كي من كؤهنه قاپيلي حياط دا اوتوران دئييلم كي! ايسكندردي ها!
ايسته ييرديك ايسكندر ايله ساغ اوللاشاق، يئنه اليميزي توتودو، دايانين! سيزه بير سؤزده دئييم، آما بو سؤز اؤز آراميزدا قالسين! بونو هئچ كيم گرك بيلمه سين!
من بو قاپيني يئرينه آساندان سونرا سيزده گرك اؤزونوزدن بير چيخار گؤرسه ده سيز! دئ نه جور؟
سيز گئديب اون- اونبئش نفر اؤز ياخين تار- تانيشلارينيزدان كي آخماقديلار گؤتوروب، اونلارين قولتوغونا دستمالدان، پولدان، تويوق- جوجه دن، هشترخاندان، قازدان- زاتدان وئريب و هامينيز بيرليكده قاپي گؤروشونه گله جكسيز! و ائله بير جور ائله يه جكسيز كي هامي سيزين گلمه نيزي گؤرسون! اوندادير كي بازاريميز توتاجاق! 75 ميليون كي قاپييا وئرميشيك، اونون يوز قاتين قازاناجاغيق! قورخمايين سيزه ده بير چاي- قليان پولو يئتيشر!!
بيز ايسكندر ايله ساغ اوللاشيب توكاندان ائشييه چيخديق، بير آندا گؤزوم ايسكندرين حياطينين او كؤهنه قاپيسينا دوشدو، آما او كؤهنه قاپي بيزه ائله نيسگيللي باخيردي!!
پئيماندان آيريليب، و ائويميزه ساري گئديرديم؛ يولدا گئده- گئده بير زاد ياديما دوشدو، ايسكندرين تزه قاپيسينين اوستونده اوچ دنه خيردا شئر هئيكلي واريدي! بيري قاپينين باشيندا، بيري يئكه تايين اوستونده، بيريده خيردا تايين اوستونده. اؤز – اؤزومه دئييرديم:گؤره سن ايسكندر بو شئر هئيكللرين نه اوچون قاپينين اوستونه ووردوروب. اولمايا اونون باشقا بير فيكري ده وار، بيز بيلميريك!
يادا او قاپينين اوستاسي.................
رضا دهقان (چنگی) قوجا قارتال
يازين نفسيله يارپاق- يارپاق، بوداق- بوداق پؤهره له نن آغاجلار هردن تورپاغين درين قاتلاريندا قالان و اؤز ايشيني گؤرن كؤكلريني يادا سالماديغي كيمي؛ خالق دا شاخه- شاخه مين ايللردن او اوزونه اوزانان و اؤز بوگونكو بويوندان يوز دفعه لر بؤيوك اولان كؤكلريني اونودور. گله جك بوتون بؤيوكلويو و گؤزله نيزلنيلمزلييي ايله گئچميشين سارسيلماز اوزلو اوزه رينده دايانير.گله جك گئچميشين شاگيردي دير، ومعلليميني نه قدر ياخشي دويسا او قدر گوجلودور.نه قدر جان آتسادا، گئچميش آدلي كؤكوندن قوپا بيلمز و بوتون يئني چالارلاري، بوي لارينا باخماياراق او زامان- زامان اؤز گئچميشيني تيكرار ائدير. بونا گؤره ده ايلكينلييه گئدن يول، اصلينده ، گله جه يه گئدن يولا ايشيق وئرير.