یارالی وطن (زلزله اوچون)
«قره داغدا تالان وار
زولفون يوزه سالان وار
گئدير سن تئز قاييت گه ل
گؤزو يولدا قالان وار!»
سايين يورداشلار، آزربايجان تورپاغي باشدان باشا گؤزلدير، ايگيدلر، ارنلر يوردودور، ائله جه هر تورپاق اؤز اولولاري و داهيلريله تانينار.
سؤزسوز كي هميشه قاراداغ آدي دئييلنده اوجا داغلار، سيخ اورمانلار، شاقراق زنگوله لي بولاقلار، بركتلي توپراق، او قوتسال توپراقدا آت گزديرن سركرده لر،اود آلديغيميز اوجاقلا، سازي- سؤزو ياراديب ياشادان شاعيرلر و آشيقلار؛ بير كلمه ده دئسك آغير- سانباللي بير ائلين زنگين تاريخي يادا دوشور. بورا اوغوزلارين مسكني اولان اسكي بير توپراقدير؛ بورادا تاريخين او درينليكلريندن قيريليب قالان هايلار- هارايلار، واردير.بورادا هله ده بيزيم ديليميزين تومورجوقلاري گول آچماقدادير.
آما حاييفلار اولسون كي قاراداغين هم مادي عابيده لري همده معنوي عابيده لري اوچوب تؤكولمكده دير! داغيلماقدادير!! چونكو بير توپراقدا ياشايان ائلدير كي اونو ساخلايير! ائل كؤچورسه هر زاد اونونلا كؤچور، تالانير!.
بيرينجي دئپريمده خالقيميزين هايينا قالديق؛ اليميزدن گلن آز- چوخ يارديملاري بؤيوك خالقيميزين سئل كيمي تؤكولن يارديملارينا قاتديق! آما بو يارامازدير! يئتمزدير!
بيرده ايشلرين هاميسي خالقين اؤز الينده دئييل كي! دا بوندان آرتيق نئيله يه بيلردي؟ قديم كيشيلر دئميش: «اؤز الي، اؤز باشي دئييلدير كي». چوخ يئرده خالقين الي باغلي دير! و اؤزگه اللر ده بورادان آپارماغي باجاريرلار، گتيرمه يي يوخ! يارا وورماغي باجاريرلار، يارا باغلاماغي يوخ! اوچورتماغي باجاريرلار، قورماغي يوخ!...
اؤزگه لرين اويدورما سؤزلري اوزقدان باخانلاري اويدورا بيلردي، آما بيزي يوخ!.اونلار اوتانمادان دئديلر! اوزوموزه يالان دانيشديلار! اوچ آي دئپريمدن كئچير! سوغوق ، قار، قاسيرغا، كولك...خالقي دووره له ييب! هله چوخو چاديرلاردا یاشاییرلار!!
سوغوقدان اؤلن اوشاقلار، قوجالاردا وار!!
نه قدر دئييم؟ دئديكجه درديم دئشيلير!
يارالي وطن
يئنه ده چيرپيندي اوره يين وطن!!!
كندين تالان اولدو، ائلين يارالي
نه دورنان قاليبدي، نه ده كهلييين
ياماجين، چيمه نين، چؤلون يارالي.
بو قار، بو قاسيرغا،بو دومان، بو چن!
هاني بس بو ائلين قايغيسين چكن؟
نئجه آغلاياسان، اوخشاياسان سن
گؤزلرين باغلانيب، ديلين يارالي.
گؤرورده ساييلماز دردين وار سنين
توكنمير دوشمانين اوره ييندن كين
كؤكسونده آچيلان چارپازلار يئرين
نئجه باغلاياسن، الين يارالي.
آرازين، ايتيريب گؤي خزريني
من حاققام دئييرسن، سويور دريني
بو ياندا سئل ييخير خودافريني
او ياندا جان وئرير گؤلون يارالي.
توته يين زيل سسي گويه اوجاليب
آيريليقدان دئييب،نيسگيلدن چاليب
خان چوبانين الي قوينوندا قاليب
سارادان آسيلي، سئلين يارالي.
داها داغلارينا آغ بولود گلمير!
داها گؤي چيمنلر سارالير بير- بير!
داها دوزلرينده جئيران مله مير!
موغانين يارالي، ميلين يارالي.
اودلار يوردو! كولون يوردوندان كؤچور
كؤكلو- سويلو ديلين يوردوندان كؤچور
بئش مين ايلليك ائلين يوردوندان كؤچور!
تاريخدن ايز قالان يولون يارالي.
رضا دهقان«چنگی»
يازين نفسيله يارپاق- يارپاق، بوداق- بوداق پؤهره له نن آغاجلار هردن تورپاغين درين قاتلاريندا قالان و اؤز ايشيني گؤرن كؤكلريني يادا سالماديغي كيمي؛ خالق دا شاخه- شاخه مين ايللردن او اوزونه اوزانان و اؤز بوگونكو بويوندان يوز دفعه لر بؤيوك اولان كؤكلريني اونودور. گله جك بوتون بؤيوكلويو و گؤزله نيزلنيلمزلييي ايله گئچميشين سارسيلماز اوزلو اوزه رينده دايانير.گله جك گئچميشين شاگيردي دير، ومعلليميني نه قدر ياخشي دويسا او قدر گوجلودور.نه قدر جان آتسادا، گئچميش آدلي كؤكوندن قوپا بيلمز و بوتون يئني چالارلاري، بوي لارينا باخماياراق او زامان- زامان اؤز گئچميشيني تيكرار ائدير. بونا گؤره ده ايلكينلييه گئدن يول، اصلينده ، گله جه يه گئدن يولا ايشيق وئرير.