Powered By
BLOGFA.COM
بعضی بین المللی! کنگره لرین قورولماسی موناسیبتینه
سن جور آداملار!
خان ایدی؛اونا، ائله بیزیم قونشو کتده خان دئیردیلر،
ایشی داوار، اینک، آت... اوغورلاماق ایدی،
بیر گون بو دؤور - برده بیر شئی تاپیلمیر؛
ممدآلی یا دئییر کی، سحر حاضیرلانارسان،
آراز قیراغیندا ائلاتلارین یانینا گئده جه ییک،
سحر، خان بیرده ممدآلی یولا دوشورلر....
سیغیرچینلار سسی ایله ایلک باهار یئتیشنده
آغ بولودلار اویناشیب، داغلاردان اؤتوشنده
ایلدیریملار چاخاندا، سولو یاغیش دوشنده
بولقوندان باخا- باخا خیالی سئویرم من.
بئشیییمی گزیرم اوشاقلیغین آدیلا
کؤکومو آختاریرام توپراقیمین آدیلا
اوچورام زیروه لره شئعریمین قانادیلا
قایالارین اوستونده قارتالی سئویرم من.
منیم ائلیم بابکدن دوشن ایزی یاشادیر
یانیر اودلار یورداندا، اودو - کؤزو یاشادیر
دده قورقوددان قالان، سازی- سؤزو یاشادیر
بودور قاراداغ آدلی ماحالی سئویرم من.
چیچکلر سیغاللاسین، باغلار منی ساخلاسین
گه لن عصیرلر بویو، چاغلار منی ساخلاسین
داغ اوغلویام، گره ک ده داغلار منی ساخلاسین
سهندی، ساوالانی، کامتالی سئویرم من.
هر اوولاقدا گزه نه اوو- مارال دئمیرم کی
ساختا مالی بزه ییب سنه آل دئمیرم کی
هر آری دوزنله یه ن شانا بال دئمیرم کی
سیلدیریمدا بسله نن شاه بالی سئویرم من.
قوجا قارتال
رضا دهقان(چنگی)
آخيب جيريخلاردا ايتمكدير سونو.
بير بولاق كؤكوندن بولاق اولماسا
چكيليب، قورويوب، گئتمكدير سونو.»
ايندي قديم زامانلار دئييل كي! گونده بير شاعير چيخير! كيمي دينديريرسن، دئيير: شاعيرم!! اؤزوده هر جوره سي تاپيلير! اينانميرسيز؟بير نئچه سين من تانيتديريم، قالانين اؤزونوز تاپارسيز!
......
گؤردویوموز یوخونو کابوسلارا یوردولار
بیز اؤلوم گونوموزو بیله-بیله یاشادیق!
قامیشدان بیر ائو تیکدیک اوچوروملار آلتیندا
قورخا- قورخا یئریدیک، اؤله- اؤله یاشادیق!
باغیمیز اودون اولدو، اودونلار کوله دؤندو
باخیشلار قم گؤزله دی، گؤزلر نیسگیه دؤندو
سیخیلان گؤز یاشلاری قوروماز سئله دؤندو
الیمیز اوزوموزده سیله- سیله یاشادیق!
میسیمیز پاخیر توتدو، کیمسه قالای وئرمه دی
چای باشیندا دورانلار بیر ایچیم چای وئرمه دی
باشچیلار حاققیمیزدان بیزه بیر پای وئرمه دی
آما بیز پاییمیزی بؤله- بؤله یاشادیق!
رضا دهقان(چنگی)- قوجا قارتال
قار یاغیر، ائله بیلیرسن
مین آرزی- دیلک تؤکولور
اوجا داغلارین باشینا
گؤیدن آغ چیچک تؤکولور
بورونوب دومانا چنه
اؤلچولوبدور دنه- دنه
سانکی گؤیده قاری نه نه
توتوبدور الک، تؤکولور
دوزلاغی بیر خیرمان سانیر
گؤورچین، یئییب، دایانیر
بیردن اولکوب، قانادلانیر
یئره آغ یئلک تؤکولور
آخشام یئتیشنده سونا
قوجاقلاشیر بالا- آنا
شنگولونون ناغیلینا
قورد یاغیر، کولک تؤکولور.
رضا دهقان(چنگی)- قوجا قارتال
جوجه لر
بئش تویوغوم کیح یاتمیشدی
بئشه چیخمادی جوجه لر.
هامیسین دوزده قالدیلار
دؤشه چیخمادی جوجه لر.
دولاندیلار یانی- یانی
سئودیلر ساری سامانی
نین اولدو اولارین جانی
دیشه چیخمادی جوجه لر.
یاشامین گونو پیس گلدی
خیرمانین دنی پیس گلدی
پاییزین سونو پیس گلدی
قیشا چیخمادی جوجه لر.
قوجا قارتال
رضا دهقان(چنگی)
زولفون يوزه سالان وار
گئدير سن تئز قاييت گه ل
گؤزو يولدا قالان وار!»
...
يارالي وطن
يئنه ده چيرپيندي اوره يين وطن!!!
كندين تالان اولدو، ائلين يارالي
نه دورنان قاليبدي، نه ده كهلييين
ياماجين، چيمه نين، چؤلون يارالي.
...دئمه لي سؤز
باغلاساندا قاپيني
باري گه ل آرخاسينا.
سنه دئمه لي سؤزوم
دوشوب ديل آرخاسينا.
گؤل اولدون، قيراق اولدوم
من سندن ايراق اولدوم
ساچينا داراق اولدوم
آتدين تئل آرخاسينا.
اؤتوب، اؤتوشمه ييميز
بيتيب، بيتيشمه ييميز
بيزيم يئتيشمه ييميز
قالدي ايل آرخاسينا.
ياشام آغاجيني
يارپاقلاريمي تؤكدولر
بوتاقلاريمي دوغراديلار
گؤوده مي كسديلر تورپاق اوزه ريندن!
سن مني گؤرمورسن داها!
سن مني تورپاغدا آختاران دئييلسن!
منده كؤكومو گونه شه سرن دئييلم!!
ديل
هره بير ديلده يازير
هره نين اؤز ديلي وار
بيرينين بيري يوخدور
بيرينين يوز ديلي وار!
بير گؤزلليك اؤنونده
كؤنلون دولوب سنينده
قورخما لال سئوگينينده
توتارلي گؤز ديلي وار.
سوغوقون كوسو ديلي
ايسسينين ايسسي ديلي
توسسونون توسسو ديلي
اوجاغين كؤز ديلي وار.
رضا دهقان (چنگي)
قوجا قارتال
منيم اولار
گه ل بولودوم، قالدين هاردا؟
ياز اولدو، اريدي قاردا
ايلديريم تك ايلك باهاردا
شاخسان منيم گؤزلريمه
چير- چيمه نيم اولار اوندا
دونيا منيم اولار اوندا.
عشقيم قاناد آچير گؤيه
قويما، كدر داشي ده يه
سن، سئويرم دييه- دييه
باخسان منيم گوزلريمه
گوجوم قنيم اولار اوندا
دونيا منيم اولار اوندا.
توت پرده ني، ديندير سيمي
اَله گتير اوره ييمي
آيلي گئجه اولدوز كيمي
آخسان منيم گؤزلريمه
يوخدان هنيم اولار اوندا
چكه- چكه قم داغيني
هئي توتورام سوراغيني
آياغينين تورپاغيني
ياخسان منيم گؤزلريمه
اوچان تنیم اولار اوندا
دونیا منیم اولار اوندا.
رضا دهقان (چنگي)
قوجا قارتال
مئي ایچیب کئفلي اولماسان
حقیقتي دئمک اولماز.
کئفسیز، داماقسیز دونیانین
وار لذتي، دئمک اولماز.
سن قار اولدون، توپراقدا من
ساچیما یامان دوشدو دن
ایندي مین الینن اَلَن
طبیعتي دئمک اولماز.
سیلمه سن دیلدن قوباري
دانیش، اولسون گئجه یاري
دئسن، واردیر اعتباري
سؤز- صحبتي، دئمک اولماز.
دونیا باشدان- باشا سیردي
حوققادي، کَلک دي، فیردي
گؤردون کامانا دؤندردي
دوز قامتي، دئمک اولماز.
«چنگي» گون بوگون کو گوندو
باغینا بیر دورنا قوندو
اورک قوشو دؤندو، دؤندو
محببتي، دئمک اولماز.
سالام سایین یازیچی و شاعیر یولداشلاریم،
بو شعیری یازماقلا ساتیریک ادبیاتدا چالیشان دیرلی دوستوم گرگرلی آرازی(کئفلی ایسکندر) سیزه تقدیم ائدیرم. دوغروداندا رحمتلیک میرزا جلیل قلیزاده دن سونرا بو ادبیاتین یئری بوش گؤرونور.
کئفلی ایسکندرین وئبلاقینا باش وورون، و گؤزل یازیلاریندان ذووق آلین. ساغ اولون.
www.kefli.blogfa.com
حؤرمتله: رضا دهقان(چنگي)
گلين بو داغلاريين او زيروه سينه
چيخاق يوردوموزون ائلينن بئله.
قارا قوشدان بير جوت قاناد بورج آلاق
اوچاق ساوالانين يئلينن بئله.
توپلانسين بير يئره بولودلاريميز
خوش خبر گتيرسين ايلك باهاريميز
سئوينجدن تؤكولسون گؤز ياشلاريميز
آخاق خان آرازين سئيلنن بئله.
دوستاغ باشيميزا سالماسين قيروو
قيريلسين بو زينجير،آچيلسين بو توو
نه آياقدا باداق، نه قولدا بوخوو
گئدك آزادليغين يولوينان بئله.
قوجا قارتال -رضا دهقان(چنگي)
گلمه ميش اولماز
قيشين قاراسيندان قورخما اوره ييم
گله جك ياشيل ياز، گلمه ميش اولماز.
بو شاخدا، بو سوغوق چكيليب گئتسه
قونچه لر، چيچكلر گولمه ميش اولماز.
هر گله ن يولچونون يولون كسيرم
ائشيدم اوندان بير سؤز، تله سيرم!
يئللر قاباغيندا زاغ- زاغ اسيرم
اوره ك تؤكونتوسون بيلمه ميش اولماز.
اوره ييمين باشين دلسه ده بئله
ائله سايماز- سايماز گلسه ده بئله
اؤزگه لر له دئييب گولسه ده بئله
گؤرسه گؤز ياشيمي، سيلمه ميش اولماز.
رضا دهقان(چنگی)
قوجا قارتال
سن بئله دؤيدون قاپيني
اؤزومدن چيخديم ائشييه
دالدادا آغلاييرام من
اوزده نئجه گولوم سنه؟
منيم اوزومده نه وارسا
اوره ييمده ائله اودور
اينانماييرسان اوزومه؟
گل، اوره يي بؤلوم سنه.
سنله اولسام فرقي يوخدور
ديريلييين، اؤلولويون
ايسته ييرسن ديري قاليم
ايسته ييرسن اؤلوم سنه.
هاردان سو ايچير بيلميرم؟
دويغولاريم هئي بوي آتير
تكجه سنه گوجوم چاتير
اؤيره نيبدير اليم سنه.
رضادهقان(چنگي)
اورك
باخيشلاريم يول اوسته دير
حسرته باخ اوره ييمده.
آهدي گلير، آهدي گئدير
مؤحنته باخ اوره ييمده.
بير بوداغدان قيريلميشيق
سنده، منده يورولموشوق
ايكي گؤز تك آيريلميشيق
قوربته باخ اوره ييمده.
باغلاييب ساچين بير توكو
باغيرير مئيداندا تكي
آغيرديسا، سئوگي يوكو
قودرته باخ اوره ييمده.
اينجه ليكده بير دانادير
شئعره، قوشقويا آنادير
بير سئوگي باهاسينادير
قيمته باخ اوره ييمده.
رضا دهقان(چنگي)
اينانميرسان
اوره ييمي سنين اوچون
بؤلورمده اينانميرسان.
قارا گؤزلريندن يانا
اؤلورمده اينانميرسان.
آلنيمدان تر داما- داما
اَريييب دولورام جاما
عئشقي ووروب قولتوغوما
گَليرمده اينانميرسان.
يوخ ساناييرسان واريمي
داشلاييرسان ايلغاريمي
آغلاييب گؤز ياشلاريمي
سيليرمده اينانميرسان.
قاخينجيني چالا- چالا
درد آز قالير، ديلدن سالا
اورك پارچا اولا- اولا
گولورمده اينانميرسان.
رضا دهقان(چنگي)
بوداغلارین قوجاغیندا
قارتال کیمي ذیروه سینه چاتمالیسان
اوره يیندن کدرلری آتمالیسان
اوشاق كيمي بال یوخویا باتمالیسان
بوداغلارین قوجاغیندا.
منیم ائلیم اَر اوغلانلار یئتیره جک
ایيیدلریم دئدیيینی بیتیره جک
کورپه لریم دسته گوللر گتیره جک
بوداغلارین قوجاغیندا.
چملي بئلين اَتك لري دومانلاشار
قیر آت گلر، یئنه قئیرت جاونلاشار
کور اوغلودا دؤیوشمه یه سهمانلاشار
بوداغلارین قوجاغیندا.
ائل دوياجاق بير گونشين شافاغيني
گؤي چيمنلر آچاجاق دير قوجاغيني
(چنگی)یئنه یاندیراجاق اوجاغینی
بوداغلارین قوجاغیندا.
عكس كمچي آراز وئبلاقيندان
كورپو
بيزيم بايراميميز او گونلر دير كي
اوركدن اوره يه يول گليب گئده.
بو تايدان او تايا كورپو سالينا
ايللر آيري دوشموش ائل گليب گئده.
ييغيشا بو شاختا، قوتارا بو قيش
ياز اولا، داغلاردا سئلله نه ياغيش
بو گؤزدن او گؤزه سئوينن باخيش
او اَلدن بو اَله گول گليب گئده.
كؤورك اوركلره دؤنمه يه آهلار
ساري باشماقلاري ايسلادا شئحلر
ياواش- ياواش اَسه او سرين مئحلر
بو اوزدن او اوزه تئل گليب گئده.
بوتون چيركينليكلر گئده قيراغا
دويغولار يوكسه ليب، سؤيكنه داغا
«چنگي» باشلاياندا شعير يازماغا
اورتايا بير شيرين ديل گليب گئده.
يئني ايلينيز قوتلو اولسون.
اينجيير
هؤروكلري آتما دالا
سينه كوسر، قول اينجيير.
آجي- آجي دانيشارسان
اوره ييم بول- بول اينجيير.
ساچ اوزانير هاردان هارا
شاعيري چكيرسن دارا
سني تاري ياواش دارا
تئل اينجيسه، ديل اينجيير.
آغ بولودلار دولو، دولو
سولاييبدير ساغي، سولو
گليب، گئتمه سن بو يولو
من هله هئچ، يول اينجيير.
قيل كؤرپوسو
صفدر معلليم، بير گون ساهاتي يوخولو اوخوموشدو؛ اونا گؤره او چؤره ك خانايا بير ساهات تئز گلميشدي. خمير ائله ييب؛ تنديري سوپورندن سونرا، اوتوروب، بير چايلاشديق. سؤز اويان- بويانا گئديب، صفدر معلليمين كوردوستاندا سيپاهي دانيش اولدوغو گؤنلره چاتدي. او بئله سؤيله ييردي:
...
محمد علي برزگر( گرگرلي آراز)
نجف عمي نين گوللوتوماني!!
...
اينانميرسان
اوره ييمي سنين اوچون
بؤلورمده اينانميرسان.
قارا گؤزلريندن يانا
اؤلورمده اينانميرسان.
آنليمدان تر داما- داما
اَريييب دولورام جاما
عئشقي ووروب قولتوغوما
گَليرمده اينانميرسان.
يوخ ساناييرسان واريمي
داشلاييرسان ايلغاريمي
آغلاييب گؤز ياشلاريمي
سيليرمده اينانميرسان.
گونلريم
بير بيتيشيب، ساغالمادي
كؤكسو يارالي گونلريم.
اوره ييمه اوخشامادي
آغلي، قارالي گونلريم.
كولك، چيمنله توتوشدو
داغلاريما تالا دوشدو
آغير كدرله اؤتوشدو
سندن آرالي گونلريم.
گليب، گئدنيم آزالدي
قاپيمي يئل- ياغيش چالدي
گؤره سنمي هاردا قالدي؟
پوللو، پارالي گونلريم.
«چنگي»، نه يالواردي سئله
بير زاد توختامادي اَله
كسه، كسه؛ بؤله، بؤله
گئتدي سارالي گونلريم.
رضا دهقان(چنگي)
«غزل» لی گونلریمدن بیر یادگار
ایستر ایسته مز
فيكرينده بي قرار اولورام ايستر- ايسه مز
قملرله هم قاتار اولورام، ايستر- ايسته مز.
یئل ترسینه، سو دالغالي، بيرده سینیق گَمي
من وصلیدن کنار اولورام ایستر- ایسته مز.
هئچ ده اينانميرام گله او، بيلميرم نه دن؟
گؤز یولدا اینتیظار اولورام ایستر- ایسته مز.
بلكه ده قيسمت اولدو دوشم بير آياغينا
يولدا دوشوب قوبار اولورام ايستر- ايسته مز.
قيش توتسادا طبيعتيمي، دئسه لر گلير
فصليم دؤنور، بهار اولورام ايستر- ايسته مز.
بئيله شيكسته حاليما باخما، جوشاندا شعر
منده كمان و تار اولورام ايستر استه مز.
واعظ يئنه ده آغزين آچيب دانلايير مني
بير چاره يوخدو،كار اولورام ايستر- ايسته مز.
بيلدين كي «چنگي» سؤزده نييه يانديرير، ياخير؟
بير جرعه ده شرار اولورام ايستر- ايسته مز.
رضا دهقان (چنگی)
گولور
بو دردي چكمك چتين
چول- بايير باغا گولور.
آلچاقلار يوكسكلره
دَره ده داغا گولور.
...
تاسف لر اولسون كي نئچه گون بوندان قاباق وارليغيميزي، ديليميزي، خالقيميزي اوره يي جه سئوه ن گنج
يوردداشيميز يونس شاهورن دونياسين دييشدي.
بيزده بو اوره ك يانديران خبري يوردداشلاريميزا،ديلداشلاريميزا، اؤزلليكله اونون عاييله سينه باش ساغليغي دئييريك.
حؤرمتله:رضا دهقان «چنگی»
توتقون معلليمين «ده ليسي يم» شعیرینه بیر سس
«توتقون» سيخ اورمانلي داغ ده ليسي دير
«گرك طبيعتده، چؤلده دانيشاق».
گؤزله يَك ياز گلسين، اَريسين قارلار
قونچه ده، چيچكده،گولده دانيشاق.
ماراللارلا دوراق قايادا، سالدا
آريلارلا قالاق شيره ده، بالدا
كهليكلرله سوزك ياماجدا، يالدا
سونالارلا اوزوب، گؤلده دانيشاق.
باده لري دوزك گؤز قاباغيندا
اَللي-اَللي گئدك يوز قاباغيندا
«سيد» له قيزاراق كؤز قاباغيندا
«بختيار»لا ساري تئلده دانيشاق.
سوفره يه دوز- چؤرك، صداقت گلسين
اورتايا بير سئوينج، محببت گلسين
«قوجا» مجليس قورسون، «سخاوت» گلسين
ييغيشاق موغاندا، ميلده دانيشاق.
«يانار» ي ايتيرديك اؤتوشن ايلده
آيريليق هاواسي چالينسين زيلده
سن او ساحيلده دور، من بو ساحيلده
ياغيشدا ايسلاناق، سئلده دانيشاق.
آسيب، كسسسه لرده بوغازين، ديلين
شاعير شاعير اولسا، ايتيرمز ائلين
«چنگي» «هاراي» چكير، آي ائللر،گلين
آنا اؤيرت دييي ديلده دانيشاق.
